阿根廷U20開火大反擊

猪拉多纳

世青盃B組成為死亡之組，首輪兩場都和波，包括大熱門阿根廷U20意外被巴拿馬U20逼和2比2，呢支六屆冠軍吸取教訓之後，今仗對加納U20，肯定會加多幾錢肉緊爭勝。不過加納小將亦高質素，唔少人外流歐洲球壇搵食。今場屬於爭出線「6分波」，兩隊都冇得縮，勢必互相駁火，Mic少首選入球大。

（周二下午3時開賽）

阿根廷上仗兩度領先都被巴拿馬追平，似有輕敵成分；不過呢支南美勁旅始終有「卡士」，尤其係攻力屬於賽事中數一數二，馬體會前鋒安祖哥利亞上仗梅開二度，相信今仗應該輪到王牌射手基奧雲尼施蒙尼發威。阿根廷貴為世青盃史上奪冠次數最多嘅球隊，冇理由分組出局咁失威，必然加強火力搶分。加納曾於09年捧盃，上屆亦獲得季軍，今屆人腳不俗，包括葡超里奧艾維射手艾曼紐保定、意甲卡利亞里中場葛費特當沙；不得不提仲有曼城前鋒耶保亞，呢位18歲新星上仗補時入波，幫球隊逼和奧地利1比1。加納中前場人才濟濟，今仗唔怕同阿根廷鬥攻。
奧地利夠贏巴拿馬

同組奧地利U20對巴拿馬U20，奧軍多位主力來自德甲球隊嘅青年軍，所受訓練及戰術執行能力，應該喺巴拿馬之上，可以秤先。