勝利船受讓搵到食

猪拉多纳

鯨魚出咗線殘陣Hea踢

今日傍晚上演日本聯賽盃分組賽尾輪，其中直播戲碼B組名古屋鯨魚主場迎戰神戶勝利船值得留意。勝利船必須贏波先可確保進身八強，戰意唔使懷疑；相反鯨魚已篤定出線，加上傷兵滿營仲點會同你搏，今仗邊有本錢讓波呢？梗係捧受讓嘅勝利船讓球客勝啦！

（有線61及201台周三晚6時直播）

睇番現時B組形勢，鯨魚甩開勝利船、山形山神及川崎前鋒五分排榜首，由於分組賽踢埋今輪便完結，因此鯨魚已穩奪首名出線資格，絕對唔使搏。而且鯨魚傷兵一大籮，唔單止有田口泰士、大武峻、丹尼臣哥度巴、青木亮太、李安度杜明基斯及高木義成備受傷患困擾，近日連隊長、前日本國腳中堅田中鬥莉王都傷埋，為免再增添十字兵，預計喺呢場例行公事會避重就輕，唔排除會派更多副選披甲。

另一邊廂，勝利船雖有前鋒馬昆奴斯、後衞相馬崇人養傷同中場奧井諒坐波監，幸好中堅威靈頓般奴已經康復，對穩住防線幫助極大。查實勝利船今季踢咗十仗作客比賽，只係輸過一場咁大把，比起主場出擊更出色，同佢哋唔擅主攻、作客專心打穩守突擊不無關係。
為爭晉級焗攻

最重要係勝利船與山形山神、川崎前鋒同得八分，暫以較佳得失球差lead住對手，為保小組次名晉級八強，一定無保留。況且幾場波同時間開賽冇得睇定嚟食，勝利船若果稍有差池，隨時連二哥位都冇埋。好彩今仗撞正hea住嚟踢嘅鯨魚，勝利船要出線就冇得諗咁多贏咗先算，讓球主客和勝利船受讓一球，讓球客勝咪錯過。