里爾三子 攻守兼備 馬里U20收成期起塞

猪拉多纳

今屆世青盃D組，非洲球隊馬里U20表現令人驚喜，首仗即贈墨西哥兩蛋。由於馬里曾經係法國殖民地，兩國關係密切，唔少馬里年輕球員去到法國受訓，並効力法甲球隊。現時馬里U20以「里爾三子」艾達馬查奧爾、尤素夫干尼、格巴基為骨幹，默契十足，攻守兼備，今日對塞爾維亞U20，仲有得受讓，馬里U20讓球客勝穩陣，甚至可直取客Ｗ。

（周三下午3時開賽）

馬里U20最威係1999年獲得季軍，可惜之後無以為繼。球隊青訓近年進入收成期，優秀新星湧現，當中以里爾進攻中場艾達馬查奧爾最出色，佢喺今季法甲上陣機會唔多，仍有兩球進帳，上仗分組賽亦為馬里打開紀錄，另一位入波功臣係球會隊友格巴基，加上尤素夫干尼鎮守防線，呢個里爾組合絕對有睇頭。法國上屆世青盃奪得冠軍，馬里身為「法國B隊」，級數自然有番咁上下，值得期待。
塞爾維亞焗攻不利

至於塞爾維亞U20上仗0比1不敵烏拉圭U20，今仗當然要搏命搶分，但佢哋人腳質素唔會高得過馬里，勉強主攻，隨時畀對手打突擊，輸得更慘。尤其係馬里擁有超班嘅艾達馬查奧爾助陣，如果塞爾維亞防線壓得太前，只會令佢有更多搵食機會。
烏拉圭可勝墨西哥

同組另一場墨西哥U20對烏拉圭U20，烏軍多位主力喺歐洲聯賽効力，包括韋斯咸中場迪亞高普耶、維拉利爾前鋒法蘭高阿哥斯達、中場羅美奧古亞拿。球隊上屆獲得亞軍，點秤都高過墨西哥，平手盤揀烏拉圭U20。