阪神打吡飛腳踢沉勝利船

猪拉多纳

另一場關乎爭標嘅賽事，就係大阪飛腳主場對神戶勝利船，飛腳現時落後榜首紅鑽7分排第2但打少一場，如果今日贏唔到勝利船就大有機會提早將錦標拱手相讓畀紅鑽。不過，飛腳近期狀態甚勇，今仗主場出擊相信都唔會留手，加上往績亦食住勝利船，阿謙喺呢場「阪神打吡戰」會繼續撐飛腳。

（有線62及202台周日下午3時直播）

今場稱為「阪神打吡戰」，係因為飛腳所在地大阪府同勝利船所在地兵庫縣神戶市相距不遠，坐特急列車約30分鐘就抵達，加上兩隊同處關西地區，所以每次碰頭都會踢得分外肉緊。飛腳喺上周中以2比0擊敗鹿島鹿角後，球隊已經連續7場未輸過，當中更贏咗其中5場，氣勢非常強勁。飛腳現時落後榜首紅鑽7分但打少1場，仍有機會後來居上取得首階段聯賽冠軍，球員現時戰意如虹，今仗更有前鋒連斯利馬刑滿復出，主場出擊肯定不勝無歸。
勝利船近6對陣未威過

勝利船上周三喺日聯盃作客以4比0擊敗名古屋鯨魚，球隊今季喺新教練尼仙奴領軍下表現未算太差，但球隊主力射手、日職史上第2位入球達到150大關嘅馬昆奴斯長期受傷患困擾，令球隊入球能力大受影響。馬昆奴斯今仗依然上陣成疑，加上後衞相馬崇人及中場三原雅俊因傷缺陣，勢必影響球隊嘅發揮。勝利船近6次鬥飛腳只得1和5負嘅劣績，明顯畀呢隊關西死對頭「食住」，今仗都係難擋狀態甚弗嘅飛腳，主W只得1.48倍雖熱但勝在穩陣，進取嘅可捧埋讓球主勝同大盤。