零星味巴西 靠鄧加打救

猪拉多纳

中超、阿聯酋搵食照入選

「足球王國」近年多災多難，巴西喺今屆美洲國家盃，竟然淪落到要搵中超球員幫拖，而且未開波，已經有主力連環因傷退隊，加上隊長尼馬要為巴塞隆拿踢歐聯決賽，踢唔到聽朝對墨西哥嘅熱身賽，令人擔心佢哋出征智利，又會遭遇類似舊年「美洲大地震」嘅大災難，依家「森巴躉」惟有希望教頭鄧加化身超級英雄，拯救廣大球迷啦！

上年巴西喺世盃4強以1:7災難性慘負德國，「寫」下國家血淚史，舉國哀號、民不聊生。雖然「森巴兵團」搵番鄧加接手、重掌帥印後「8戰8勝」，表面上好似重現強勢咁，原本以為佢哋今年可以喺美洲國家盃做番齣好戲安撫吓Fans啦，點知未出發備戰，就已經再次受到嚴重打擊，先係有車路士中場奧斯卡杜斯山度士因傷退隊，家陣連皇家馬德里左閘馬些路都話踢唔到，突然間冇咗兩件大將，你都咪話唔頭痕。
網民寸爆：史上最曳森巴軍

事實上，現時巴西大軍嘅陣容，被網民恥笑係史上最冇星味嗰隊，就連喺阿聯酋捱緊世界嘅艾爾阿里中場艾華頓列比路、踢緊中超FC山東嘅迪亞高泰達利，竟然都可以入選國家隊，難怪有球迷擔心，「足球王國」喺世盃經歷嘅劫難，只不過係前奏，去到智利踢美洲國家盃，有可能會遭遇天崩地裂式嘅真正「美洲大地震」，認真得人驚！
法明奴 泰達利 孭起巴西鋒線

由於隊長尼馬尋日先踢完歐聯決賽，聽朝巴西對墨西哥場波已經唔使預佢；山度士嘅羅賓奴近年返唔到歐洲落班，有幾叻大家心照，最好笑係羅賓奴練波又整親，家陣「森巴兵團」只係得番一件中超射手可用……賀芬咸攻擊中場羅拔圖法明奴，都可能要客串踢前鋒，咁嘅情況，睇怕都係要靠回歸後領軍8戰全勝嘅鄧加，施展魔法拯救球隊，幫巴西球迷喇！
Data King鄧加掌舵「8戰8勝」

‧鄧加重掌巴西帥印後8戰全勝。

‧雙方對上27次交手，巴西錄15勝4和8負。

‧墨西哥連開8口半場細。