西班牙點讓哥斯達黎加?

猪拉多纳

貼錯門神 皇巴兵又內鬥

今晚國際熱身賽壓軸好戲，軍心不穩嘅西班牙喺主場迎戰哥斯達黎加。「鬥牛國」近期是非多多，兩大神龍卡斯拿斯同迪基亞「貼錯門神」面左左，碧基又衰多口，引發陣中巴塞同皇馬幫矛盾，家嘈屋閉令老帥迪保斯基忙住搞維穩，隨時畀哥斯達黎加偷到雞，仲有得受讓梗係捧讓球客勝。

（now 633周五凌晨4時直播）

由於西班牙門將兼隊長卡斯拿斯漸走下坡，老帥迪保斯基特登為曼聯神龍迪基亞未來接班鋪路，世盃後對兩人採用輪換制，雖然卡斯拿斯冇乜出聲，但迪基亞「得寸進尺」，佢快將轉投皇馬嘅消息甚囂塵上，畀人連踩兩大地盤，「聖卡斯」條氣梗係唔順喇，日前迪基亞喺停車場兜口兜面見到呢位隊長招呼都冇打，令兩人不和浮晒面。
仲有歐國外鬥白俄「後顧」

一波未平一波又起，巴塞中堅碧基拎番年頭皇馬慘吞馬體會4蛋後，C朗照開生日P單舊聞嚟講，話多謝當日將開P相鋪上twitter嘅哥倫比亞歌手Roldan，認為佢此舉打擊皇馬士氣，才令巴塞喺聯賽後來居上奪冠，呢番言論激起內部巴塞同皇馬幫矛盾。老帥迪保斯基雖然話唔使太認真，但亦提醒任何人，若傷害國家隊便不獲徵召，始終「皇巴」仍係西班牙骨幹，睇嚟佢老人家忙住搞更衣室維穩。

上年世盃殺入8強嘅哥斯達黎加，現由前球隊射手雲祖柏執教，今次召入皇馬門神基羅拿華斯、拜仁雷斯同祖爾甘保等猛將，絕非善男信女。而且西班牙近三仗熱身賽對荷蘭、德國同法國輸晒，嚟緊周一凌晨仲有歐國外作客白俄羅斯後顧，今仗就住嚟踢唔奇，加上軍心不穩，斯維寧願博輕裝上陣兼受讓嘅哥斯達黎加，讓球客勝咪錯過。