土耳其-1都夠薩

猪拉多纳

球會級賽事雖然完咗，但緊接住就有勁多國家隊級別比賽，真係球迷福音，今日阿King就想同大家講吓歐國盃外圍賽A組直播賽事，哈薩克主場對土耳其，雖然土耳其近年實力減退，但對住世界排名133嘅哈薩克，冇理由咁都贏唔到兩球或以上，一於捧讓球客勝！

（有線61、64、高清201及203台周六凌晨零時直播）
哈薩克主場冇優勢

土耳其喺國際賽場都試過攞到好成績，02年韓日世界盃奪得季軍，08年歐國盃決賽周又打入4強，嗰陣嘅土耳其都有唔少明星球員，好似哈根蘇古、沙斯、安利、咸美艾天托普、羅士圖列巴等。不過土耳其近年成績退晒步，上屆入唔到歐國盃決賽周，今屆亦危危乎，依家身處外圍賽A組第4，5戰得5分，想超越頭3位嘅捷克、冰島同荷蘭真係勁高難度。但唔努力過又點知結果呢，今場對住組內實力最弱嘅哈薩克，土耳其點都要搏盡。今場喺哈薩克前首都阿拉木圖作賽，土耳其對上一次喺嗰度對住哈薩克大勝6比0，即使今場好難再複製多次呢個賽果，至少都唔會贏得1球咁少喇，捧讓球客勝！

同組另一場，冰島主場對捷克嘅榜首大戰，冰島近三次主場都一球不失，今場對住實力較高嘅捷克，和波都冇壞，預料冰島會穩守為先，細盤值捧。最後阿King講埋H組挪威主場對阿塞拜疆一戰，挪威雖有前鋒艾爾尤諾斯停賽，但戰績食住對手，讓球主勝值得一試。