墨西哥考牌踢好「玻」

猪拉多纳

散仔掛帥搏命爭上位

冇查維亞靴南迪斯、古亞達度、奧祖亞又點喎！墨西哥領隊米基爾靴里拉以半考牌形式點兵征戰美洲國家盃，今屆賽事係咪一定冇運行呢？未必喎！佢講明表現對辦嘅「考生」隨時榮升做常規主力，聽朝喺A組首戰夠晒動力，有權做低諸事不順嘅玻利維亞，讓半一捧上盤。

（now681台周六早上7:30直播）

墨西哥領隊米基爾靴里拉嘅目標，係7月頭嘅美洲金盃，所以今次佢點兵征戰美洲盃留晒力，一班喺歐洲搵食嘅名牌好似「小豌豆」、「Sam哥」同卡路士韋拿等悉數落選，取而代之係搵隊長馬基斯Lead住班波，配合捷西斯哥朗拿同魯爾占美尼斯呢班散仔。
捷西斯哥朗拿

川迪孭重飛

米基爾靴里拉賽前揚言，墨西哥要爭美洲盃冠軍唔係奢望，亨格比利覺得佢吹大咗，但佢話藉今次賽事考牌，為國家隊揀新血就夠晒推動力。何況墨西哥陣中都有唔少好嘢，中場指揮捷西斯哥朗拿喺川迪已經嶄露鋒芒，喺馬體會坐多過踢嘅前鋒魯爾占美尼斯亦要證明身價，加埋瓜達拉哈拉件超新星守將卡路士沙些度等緊上位，一眾散仔喺考牌戰實搏喎！
門口狗玻利維亞

球員練波冷親

況且擅於喺高原比賽嘅玻利維亞正式係門口狗，前日朝早喺智利聖地亞哥練波之後，軍醫卡路士佩雷斯就指陣中幾位球員都冷親。仲有，南美足協尋日突擊檢查，殺去玻利維亞下榻嘅Renaca酒店，搵咗包括隊長拉迪斯在內等6位球員進行藥檢，搞到呢班友冇覺好瞓！

加埋主力射手馬些路摩連奴禮拜日喺友賽領嘢，畀阿根廷守將加雷撞親隻右腳，今鋪就算落到場都未必十足狀態。呢隊玻利維亞又孱仔又黑仔，輸大鑊有乜咁奇呀？（美洲盃Ａ組）
Data King：玻利維亞半場7戰不勝

‧墨西哥近8仗7次開半場細。

‧墨西哥對上一次輸畀玻利維亞，已經係18年前。

‧玻利維亞最近7場未試過半場領先。
乜都玩錦囊：墨西哥搶攻352玩「大」佢

墨西哥前日練波嗰陣，主帥米基爾靴里拉喺最後15分鐘將操練對外開放，當地記者發現佢試緊首戰正選陣容，並大玩352陣式，打得3個後衞，呢場波唔慌保守啦，1.95倍入球大要捧。