金澤強「細」爭升班

猪拉多纳

起大樓 申請J咧牌

真係着手申請日職參賽許可證喎，睇嚟日乙「三哥」金澤薩維根堅想升班，今日佢哋主場迎戰包尾大幡大分三神，贏波決心唔使懷疑，只不過佢哋鋒力唔強，點都係博1.46倍入球細穩陣啲。

金澤可以話係呢季日乙嘅奇葩，喺上場作客輸畀磐田山葉之前，一口氣13場不敗，仲曾經上過榜首，以一支低成本經營嘅球隊嚟講，絕對係唔簡單。呢班波最大優點係團結，鬥志鮮明，但所謂限米煮限飯，佢哋冇可能買到啲一流嘅前鋒，所以開季17場聯賽，開咗12場細，比率高達71個巴仙，比起日乙平均值62個巴仙高出9個百分點，稱得上係日乙「開細之王」。
大分三神2件打柴

入波少又如何？金澤依家仲名列三甲，雖然落後榜首大宮松鼠5分，仲係有機會爭第2直升日職，就算爭亞軍失敗，假如按佢哋家陣嘅走勢，打入升班附加賽絕對唔成問題，難得在金澤嘅管理層唔似其他球隊咁冇上進心，決定呢個月中入紙申請日職參賽證，上星期四仲拉隊拜會金澤市市長山野之義，求佢幫手响安原體育廣場起辦公大樓，以符合升班條件，由於得到市政府支持，金澤好大機會達到升日職嘅基本設施要求，因為咁，佢哋响聯賽肯定搏甩髀。

相反大分三神就弊嘞，目前唔只包緊艇，前鋒永井龍、巴西裔嘅東帝汶國腳中場菲臘比都傷晒，而且又8連不勝，衰到貼地。為咗救亡，大分响月初炒咗主帥田坂和昭，改由強化．育成部長柳田伸明執教，呢位仁兄上任之後起用一批跑狗，大分成隊波活力強過以前，上星期就主場2:2打和京都，今日對住攻擊力唔強嘅金澤，慘敗機會好低，投X首選自然係入球細，如果嫌奀就不妨博吓1.85倍半場和。