英格蘭疲兵捱細界

猪拉多纳

歐國盃外圍賽E組榜首英格蘭，今晚將會作客斯洛文尼亞。「三獅軍團」班波搏完成季後經已殘殘哋，上仗悶和愛爾蘭0:0，充分凸顯佢哋破關乏力，呢鋪對住喺主場踢高兩班波嘅斯洛文尼亞，隨時出現老鼠拉龜嘅情況，橫睇掂睇，都係捧1.57倍入球細最抵。（有線61及201周一凌晨0:00直播）
斯洛文尼亞

地頭超硬淨

「三獅軍團」今仗雖然有射手朗尼同當弗翼鋒禾確特壓陣，不過史杜列治、韋碧克、哈利卡尼通通落選，相信幾難畀到驚喜大家。況且大家都知，英超幾乎係全球最激烈嘅聯賽，成班「三獅兵」搏足一整季後，狀態回復唔切，剩番幾多戰鬥力真係好難講。你睇佢哋上場對住愛爾蘭，成場波幾乎都冇乜似樣啲嘅攻勢，就知英格蘭班人嘅狀態曳成點，今場仲旨意佢哋大發神威數胡？咪玩啦！

另邊廂，斯洛文尼亞目前憑住對賽成績優勢，壓倒瑞士排喺E組次席，足見呢班波實力有番咁上下。最重要一點，係佢哋早前試過喺自己地頭，以1:0氣走瑞士，證明斯洛文尼亞喺自己地頭的確踢高一皮，英格蘭呢鋪想隊多兩粒，真係唔易囉。 （歐國外E組）