阿根廷開W吐「烏」氣

猪拉多纳

上場Lead住被逼和一肚火

矢志捧走今屆美洲盃冠軍嘅阿根廷，首戰竟然落筆打三更被巴拉圭逼和2:2，一眾球迷梗係唔收貨。主帥馬天奴賽後直言球隊好似犯罪一樣，就連王牌美斯都話咁嘅表現係唔可以接受。班球員家陣谷住谷住，聽朝迎戰B組榜首烏拉圭肯定搵對方祭旗贖罪，就算呢次「潘帕斯雄鷹」讓半一，都一樣照撐1.81倍上盤。（now681台周三早上7:30直播）
美斯知衰唔驚密集防守

堂堂世盃亞軍上場喺半場領先對手2球下，竟然畀巴拉圭追和嘔番2分出嚟，阿根廷成班球員梗係一肚火。賽後領隊馬天奴都冇護短，承認咁樣被追和簡直同犯罪冇分別，又鬧爆班波上下半場表現猶如兩支唔同球隊。主力美斯都知衰，揚言佢哋今仗一定要有所改善，擺明要獵「圭」吐烏氣，烏拉圭今次有難咯！

相比喺世盃嘅表現，「潘帕斯雄鷹」依家嘅火力的確有改善。上仗面對巴拉圭嘅密集死守都創造到唔少機會，加上一對箭頭美斯、阿古路已亦齊齊開齋，後備席又有泰維斯同希古恩等好手喺度等住騷哥利，火力仍然有十足保證。
烏拉圭冇哨牙蘇唔識攻

另邊廂嘅烏拉圭上仗雖然旗開得勝，1:0打敗牙買加全取3分暫列B組榜首，但實情入肉攻勢欠奉，只係單靠死球攻破對手大門，贏得一啲說服力都冇。反映佢哋冇咗射手蘇亞雷斯幫拖後，攻擊力同組織力嚴重下滑，再冇同列強一拚嘅本錢。

更大鑊嘅係烏拉圭連引以為傲嘅防線都跌埋Watt，以馬體會中堅高甸為首嘅後防全場表現慌失失，益咗牙買加有唔少「餐士」破關，可惜限於球員埋門質素最終先輸波飲恨。呢鋪佢哋對住把握力一流嘅美斯、阿古路，想零封對手真係發夢都冇咁早！（美洲盃B組）