哥國英軍生死戰吼半和

猪拉多纳

在加拿大舉行嘅女子世界盃，F組上演生死戰，英格蘭女足鬥哥倫比亞女足，英軍今屆靠晒前鋒東妮杜根孭飛，可惜佢傷好冇耐狀態麻麻，「英女」今場要爭取勝利真係窄窄哋，相反哥軍今仗唔輸就出線，睇定嚟食半場和值捧。（周四凌晨4時開賽）

電玩遊戲《FIFA16》食住個勢加入女子足球元素，我諗好多「機友」都勁興奮！事關女足界大把女神級球員，好似巴西瑪達、美國女神雅歷絲摩根等。其實英格蘭前鋒東妮杜根都星味十足，可惜佢今年曾嚴重膝傷，雖然趕及踢今次世盃，但狀態仲未操弗，累到英軍攻力大減，首戰對法國早段失波都追唔番，上場對墨西哥要去到下半場後段先破網成功。

嚟到F組最後一輪比賽，英格蘭同法國一樣同得3分，英軍以較佳得失球排緊第2，榜首嘅哥倫比亞有4分，即係話英軍只要贏波就一定出線，可惜以佢哋嘅攻力好難咬得入對手。哥軍喺今次世盃一直踢得唔錯，今場只要保住不敗，攞到1分都夠出線，幾大守住自己嘅城池，上半場隨時窿對窿，一於博半場和！
法國要贏波搶出線權

同組另一場墨西哥對法國，法國只要贏波就穩奪出線權，面對實力較弱嘅墨西哥，肯定狂攻對手，法國贏兩球或以上唔係冇可能，捧讓球客勝喇！