秘魯委內瑞拉大駁火

猪拉多纳

明早美洲國家盃C組次輪獨腳戲，由上屆季軍秘魯硬撼殿軍委內瑞拉。委內瑞拉上仗爆冷擊敗勁旅哥倫比亞，士氣如虹，佢哋梗係想食住個勢，報番上屆季軍戰敗辱。不過，秘魯亦有法芬同祖安華加斯等外流球員壓陣，加上後備席仲有秘密武器「Pizza佬」比沙路候命，為出線今仗必以3分為目標，隨時合演入球騷，斯維首選大盤。(now 681周五早上7時30分直播)

名不經傳嘅委內瑞拉，喺C組首仗爆冷擊敗坐擁「J神」占士洛迪古斯、法卡奧、卡路士巴卡等球星嘅哥倫比亞，真係唔聲唔聲嚇你一驚，雖然委軍陣中全無星味，但効力俄超冠軍辛尼特嘅前鋒荷西朗頓級數唔錯，上仗就係靠呢位國際米蘭青訓產品一箭定江山，而曾去過西甲同德甲搵食嘅中場核心艾蘭高，堪稱委內瑞拉球王，其精湛嘅死球絕技係球隊一大殺着。委國上屆喺季軍戰慘敗畀秘魯1比4，難得依家個勢咁好，自然希望報番4年前一箭之仇。
荷西古里路法芬孭飛

至於秘魯首仗末段慘遭巴西反勝，但表現一啲都唔失禮，除咗有史浩克04翼鋒法芬同費倫天拿左閘祖安華加斯助陣，邊路側擊堅有保證，上屆神射手荷西古里路仍係中鋒首選，若果需要加強攻力，後備席仲有「Pizza佬」比沙路隨時候命，呢位36歲前鋒寶刀未老，絕對係球隊嘅秘密武器。

由於秘魯首仗輸波，尾輪又要火併哥倫比亞，為咗出線，今仗面對實力較弱嘅委內瑞拉，必定火力全開搶3分，委內瑞拉亦想報仇，故兩軍隨時大駁火鬥攻，肯定多波入，大盤有成2.35倍，實在非常值博。