英幼獅冇牙惡唔出樣

猪拉多纳

歐國盃U21上演B組賽事，由英格蘭U21迎戰葡萄牙U21。雖然「幼獅兵」有熱刺超新星哈利卡尼孭飛，但佢哋已經連續兩屆分組賽出局，完全靠唔住，平手盤要1.92倍葡萄牙。（開賽時間：周五凌晨2:45）

「幼獅兵團」前屆得2和1負分組賽出局，點知上屆仲衰，就算有域咸、韋費特沙夏、佐敦軒達臣同奇治戴臣壓陣，分組賽竟然3戰全敗玩完，證明佢哋牌面上無論有幾好睇，始終都係靠唔住。今次英格蘭有熱刺射手哈利卡尼、曼聯翼鋒連迪加特同阿仙奴後衞哥林張伯斯入選，你估又會好叻咩？
葡U21多人穩佔球會正選

另邊廂嘅葡萄牙，近4次出戰U21歐國盃，其實都有3次分組賽止步，但陣中嘅拉科魯尼亞前鋒艾雲卡華利路今季喺西甲入到3球，而且布拉加中場拉法施華、艾斯杜尼中場圖斯及費利拿中場沙治奧奧利華拉亦已經喺球會打正選，根本唔會驚「幼獅兵團」嘅所謂球星，所以都係咪盲目信名牌，寧博葡萄牙小組旗開得勝。