智利夫添出擊歎私房「玻」菜

猪拉多纳

維達爾醉駕炒車照孭飛

智利球星維達爾喺美洲國家盃踢到曉飛，本來受盡國民擁戴，點知日前竟然爆出單醉駕炒車被捕，頓時由國家英雄慘變過街老鼠，難得領隊森柏奧利開聲力撐人誰無過，決定唔踢佢出國家隊，智利聽朝喺A組煞科戰迎戰「私房菜」玻利維亞，維達爾實搏到盡幫國家隊爭取首名出線，趁機報答領隊同挽回民心，一於捧1.73倍「讓主」！ （now681台周六早上7:30直播）

由於分組賽煞科戰「前後腳」進行，如果「早場」厄瓜多爾能夠擊敗墨西哥，又或者兩隊和波嘅話，目前暫列首、次名嘅智利同玻利維亞，其實和波都夠分鎖定直接出線席位，名副其實「睇住嚟踢」。
分組Last Rd踢尾場

「睇住嚟踢」有着數

之不過咁，智利話晒喺自己地頭出擊，阿歷斯山齊士、伊度亞度華加斯等球星喺主場擁躉面前點敢Hea踢先！再講吖，維達爾醉駕炒車搞到杰撻撻，唔少智利傳媒、名宿都對佢口誅筆伐，提議將佢踢出國家隊，難得主帥森柏奧利繼續力撐，話唔想失去呢位重要球員，就連隊友「A山」亦喺社交網撰文支持，相信頭兩輪省3粒、暫列神射手榜首嘅維達爾，今場勢必盡砌幫智利贏得好好睇睇。
玻利維亞

近7次交手6負

另邊廂，玻利維亞3輪分組賽分別喺3個球場進行，相比智利全部分組賽喺同一個球場踢，適應程度已經輸蝕唔在講，佢哋近年對親智利都冇好下場，近7次交手除咗1場熱身賽和波唔使輸，其餘6場盃賽統統「清脆」落敗，每場最低限度以兩球差距輸波，今場作客來勢洶洶嘅智利，真係想唔輸鑊甘都幾難。（美洲盃A組）