墨西哥冇料到焗攻「瓜」得

猪拉多纳

墨西哥喺美洲盃A組，同厄瓜多爾合演最後一場分組賽。墨西哥今次冇徵召一班主力，戰力即時弱晒，分組賽頭兩場表現唔多掂，搞到出線形勢好被動。雖然今場對手厄瓜多爾實力平平，但以墨西哥現時狀態要贏波唔容易，1.52倍嘅「讓客」仲抵玩！（now681台周六清晨5:00直播）
厄瓜多爾打反擊

華倫西亞射得爆得

墨西哥今屆冇叫杜斯山度士、安達靴里拉等主力入伍，實力真係弱咗唔少。佢哋分組賽首場悶和玻利維亞，第2場對住東道主智利，只能以3:3逼和對手，依家喺A組得2分排第3，出線形勢唔多樂觀。佢哋今場對住榜尾嘅厄瓜多爾一定要贏之餘，仲要寄望玻利維亞同智利唔好打「默契波」博和，如果唔係就要睇可唔可以最佳第3名出線。

今場墨西哥唔可以歎慢板焗攻，一定壓前進攻，到時後防實有唔少空位畀厄瓜多爾攻，都唔好話唔牙煙。厄瓜多爾出線只得數字上嘅希望，但為咗唔好3場輸晒出局，一定會搏盡。佢哋陣中前鋒安拿華倫西亞又爆得又射得，厄軍要偷雞成功真係靠晒佢。（美洲盃A組）