阿根廷買得過

猪拉多纳

賀美斯100戰

阿根廷喺明早美洲國家盃B組最後一戰對兩戰全敗嘅牙買加，由於阿根廷仍未穩奪出線，面對牙買加肯定全力爭勝。適逢呢場賽事係美斯第100場國際賽，下周三（24日）又係佢28歲牛一，因此縱然主帥馬天奴將派部分副選應戰，但球隊仍會盡砌，除咗幫球隊贏波晉級外，更提前為「百戰隊長」生日送上賀禮。睇好阿根廷可大炒牙買加，捧讓球主勝。

（now 681周日清晨5時30分直播）
阿古路缺陣照搶攻

美州盃B組嘅出線形勢都幾複雜，除咗牙買加兩戰全敗肯定出局外，其餘3隊阿根廷、巴拉圭同烏拉圭都仲有機會，當中4分嘅阿根廷同巴拉圭形勢最好，排第3嘅烏拉圭想肯定出線就一定要贏烏拉圭。因此阿根廷今仗只要有分落袋就肯定出線，但球隊過去兩場表現唔算突出，今場唔會求和算數，面對已出局嘅牙買加自然希望大勝一仗重振雄風。

阿根廷今仗有主帥馬天奴因上仗兩度走出指揮區抗議球證被罰停賽，今仗只能遙控領軍。馬天奴賽前已講明今仗會派部分副選上陣，至於上仗入球功臣阿古路則因拉傷膊頭可能倦勤。不過王牌美斯將繼續領軍。今仗係美斯第100次代表阿根廷，加上生日將近，因此自然想領軍贏波出線，兼賀自己攞第100頂喼帽啦！美斯賽前接受《奧萊報》訪問時表示：「我好開心能達到呢個里程碑。呢100場比賽無比美妙，令人難以忘懷，我要感謝幫助我成長嘅人。可惜我從未贏到任何冠軍，至於生日願望就係捧走美洲盃。」美斯開到口，相信一眾隊友都會識做，全力搶攻，以爭取以一場大勝獻畀「百戰隊長」。
牙買加無心戀戰

牙買加喺今屆賽事表現平平，兩戰全敗提早出局，今仗都唔慌有心機踢。事實上，牙買加下月就會去美國踢美洲金盃，球隊今次出征美洲盃明顯係寓賽於操，去到美洲金盃先至會打真軍，今仗面對矢志贏波嘅「潘帕斯雄鷹」都係等做炮灰，讓球主客和阿根廷雖然要讓到兩球，但阿謙有信心讓球主勝可以順開出。