教頭停賽中國女足喀親

猪拉多纳

女子世界盃16強聽日早上有激戰，中國女足出戰喀麥隆女足，「中女」今屆賽事3場波都陷於苦戰，表現力有不逮，最大鑊係領隊赫偉今仗停賽，未能於場邊指揮大軍，無疑會對呢支年輕嘅中國女足造成沉重打擊，讓唔起身體質素較佳嘅喀麥隆女足，一於揀讓球客勝。

（中央5台周日早上7時30分直播）

中國女足首仗畀東道主加拿大絕殺，尚算情有可原，但之後兩場表現平平無奇，僅於補時入波小勝荷蘭，上仗對全組最弱嘅新西蘭更被逼和2比2。領隊赫偉激到情緒失控，畀球證紅牌趕出場，搞到今場需要坐波監。中國球員都係26歲或以下，缺乏大賽經驗，嚟到淘汰賽先冇咗主帥指揮，一旦遇逆境隨時陣腳大亂，情況令人擔心。

喀麥隆女足分組賽曾大勝厄瓜多爾6球，即使對住上屆冠軍日本亦只係僅負1比2，上仗更反勝瑞士。呢支「非洲雌獅」體力充沛衝擊力強，相信可以憑天賦本錢壓迫「中女」，唔易被擊敗，今場受讓非常着數，甚至90分鐘內贏埋都唔奇。
德女火力猛炒起瑞典

至於大熱門德國女足對瑞典女足，兩隊實力有距離，「德女」3戰入15球輕鬆出線，反觀瑞典女足3場分組賽都只係和波，僅以其中最佳小組第3位資格晉級，實在唔可以同德國相提並論，大敗好正路，直取讓球主勝。

（中央5台周日凌晨4時直播）