小日耳曼埋丹開齋

猪拉多纳

今晚U21歐國盃A組次輪尾場，大熱門德國U21出戰丹麥U21。備受睇好嘅「小日耳曼兵團」首仗大意失分，劣評如潮，預計主帥賀巴殊會變陣出擊，有傳禾蘭會打番最擅長嘅中鋒位，勢必炸散丹麥打開勝利之門，簡簡單單捧主勝。

（周日凌晨2時45分開賽）

德國大國腳上年勇奪世盃，小國腳亦唔嘢小，睇番今次出征U21歐國盃嘅大軍名單，安利簡恩同禾蘭已經略有名氣，門神達史特根更啱啱幫巴塞隆拿喺歐聯封王，論經驗比其他U21球隊更勝一籌，難怪被捧為奪標大熱。可惜首仗只能賽和實力一般嘅塞爾維亞U21，賽後有馬菲亞斯真達、麥斯美亞、摩列斯列拿等多名球員獲得5分（1分為最高分），劣評如潮，守將基斯甸根達仲做埋「紅牌阿姑」，今仗要坐波監添。
丹麥上仗爆冷難再偷雞

好彩主帥賀巴殊一向有計，呢位曾帶領奧斯爾、紐亞、曉姆斯等於09年U21歐國盃奪冠嘅教頭，打算變陣出擊，有傳上仗焗打右翼嘅禾蘭會打番中鋒，麥斯美艾洛特會取代麥斯美亞，連同紅軍悍將安利簡恩鎮守中場，相信會增強「小日耳曼兵團」嘅進攻組織。丹麥U21首仗爆冷反勝東道主捷克U21，令人喜出望外，可惜整體實力遠遜德國，而且首場贏波反而令對手提高警覺，好難再偷到雞，禾蘭打番最擅長嘅中鋒位，必定騷哥利爭取士哥回報賀帥，主勝有1.59倍咪嫌少呀。