英意U21絕地翻身戰

猪拉多纳

兩大歐洲名牌英格蘭同意大利唔單止大國腳唔掂，連一班U21小將都令人失望。英軍同意軍喺捷克舉行的U21歐國盃B組日前分別輸畀葡萄牙同瑞典，今晚兩軍誓打爭氣波！早場先有英格蘭U21對瑞典U21，「幼獅」非勝不可下戰意鮮明，加上球員質素較對手高，科娜一於捧客勝！

（周一凌晨零時開賽）

英格蘭揭幕戰對葡萄牙唔係冇攻勢，只係攻極唔入，比拉希奴因傷退隊，主要靠哈利卡尼一個，點知呢位熱爆新星多次門前失機，累「幼獅」輸0比1變罪人。不過好彩嘅係上場只係英軍首戰，想博翻身晉級4強仲有兩場機會。
哈利仔要做番場好戲

「哈利仔」有料到係人都知，此子夠晒勤力，又識走位，充滿埋門觸覺，技術同射術亦唔錯，今場只要調整好自己嘅心態，唔受上場輸波影響，相信要入波率領英軍全取3分非難事。瑞典U21上場對意大利表現令人驚喜，大部分時間10人應戰下竟然可以反勝對手，不過就係因為一班主力上場搏到盡，又只得兩日時間休息，今場對英軍腳仔軟都唔定，難再爆冷多一場。
意大利撼葡軍鬥數胡

接住就有意大利U21對戰葡萄牙U21，意軍為搶分唔攻唔得，球隊一對箭頭杜文尼高貝拉迪同比洛迪都有級數，焗攻情況下要爭取入波唔難，不過葡萄牙亦係今屆賽事熱門之一，攻力都唔弱，今場捧入球大好過。

（周一凌晨2時45分開賽）