哥倫比亞食魯 上盤有捧趁早

猪拉多纳

J神法卡奧孭飛 卡士贏晒

美洲盃C組形勢緊湊4隊同得3分，最後一戰除咗巴西會同委內瑞拉爭出線之外，哥倫比亞亦會同秘魯交手。家陣哥倫比亞因為對賽成績較差暫列榜尾，幸好佢哋上場砌底巴西信心返晒嚟，今鋪繼續有占士洛迪古斯、法卡奧等球星孭飛，對住「送分童子」秘魯肯定殺無赦，嫌主勝得1.46倍唔夠分頭，可以考慮讓一球嘅2.05倍上盤。（now681台周一凌晨3:00直播）

哥倫比亞喺首戰0:1輸畀委內瑞拉後，領隊比克文隨即變陣，以杜費路古迪利斯取代名氣較大嘅卡路士巴卡，加強中前場組織力，果然迅速反底以1:0砌低奪標熱門巴西搶得救命3分。家陣哥倫比亞士氣High到爆，想再下一城贏多鋪相信問題不大。
秘魯三線甩皮甩骨

雖然効力西維爾嘅射手卡路士巴卡，上仗因為同尼馬推撞領紅被罰停賽兩場，今晚唔使預佢落場，幸好哥倫比亞仲有射手法卡奧、中場古達度、占士洛迪古斯等星級戰將幫手，要對付秘魯仍然綽綽有餘。咪忘記佢哋近10次對賽都冇輸過畀秘魯，近兩場對戰仲分別以2:0、1:0輕取對手，喺呢場生死戰再鬥手下敗將，信心自然更充足。

秘魯上仗藉住委內瑞拉守將阿武列比達被逐，大部分時間踢多個、兼且僅得1次攻門中龍險勝1:0，係就係打開勝利之門，不過呢3分始終唔太夠說服力。況且佢哋有中場基斯甸古華、守將阿斯古斯賽後被驗出受輕傷，今場就算踢得都要紮住上，何況翼鋒法芬又因藥物敏感未必披甲，中場盧巴頓態沉又可能被貶落後備，成隊波甩皮甩骨，睇怕都好難喺呢場生死戰逃出生天咯！