牙買加食住個勢爆墨西哥

猪拉多纳

舒哈化有冠軍命！

美洲金盃決賽將於明早喺美國費城爆發，由「神奇球隊」牙買加對墨西哥！牙買加愈戰愈勇，4強更淘汰大熱門東道主美國，首次進身金盃決賽，銳不可當。墨西哥雖然係呢項盃賽決賽常客，但整體演出麻麻，今屆5場比賽只有1場可以喺法定時間90分鐘贏波，加上連續兩場加時激戰，球員體力輸蝕，讓唔起對手半一，捧牙買加下盤。

（周一早上7時30分開賽，馬會網上文字直播）

牙買加兩年前由德國名帥舒哈化執教後，沾上德國「冠軍旺氣」，上年率先捧走加勒比海國家盃，今屆美洲金盃再賈其餘勇，一路踢嚟表現出色，除首仗打和哥斯達黎加之外，其後4戰全勝，包括上仗4強戰以2比1清脆擊敗東道主美國，堪稱近年代表作，可見牙買加無論狀態同士氣都處於巔峰，勒都勒唔住。

雖然牙買加決賽經驗唔及墨西哥，但「浪人主帥」舒哈化教過歐洲、非洲、亞洲及美洲球隊，足迹遍布全世界，亦贏過唔少獎盃，包括02年率領喀麥隆捧非國盃冠軍，見慣大場面。以舒帥嘅資歷絕對壓到場，又點會怕墨西哥。
墨軍「外強中乾」

墨西哥喺呢個盃賽好威水，曾9次奪冠屬最多次數國家，過去3屆亦2次捧盃，所以難免被秤先兼要讓波。不過以佢哋今屆表現嚟睇，根本「外強中乾」，除首仗大炒魚腩古巴外，其餘4場冇腳好波，4強淘汰巴拿馬最為驚險，墨西哥大部分時間踢多一個都要先落後，要戰至補時靠12碼驚險扳平，加時反超前1球亦係憑一個12碼，贏得毫無說服力。兼且墨西哥連續兩場都要加時捱到殘，唔好話讓波，隨時輸埋都唔出奇。