藍戰士發惡 狂擦私房「塞」

猪拉多纳

國冠盃北美站聽朝又有重頭戲爆發，英超冠軍車路士，將會喺馬里蘭州強戰西甲盟主巴塞隆拿。「藍戰士」領隊莫連奴今次美國行唔係玩玩吓，鋪鋪強陣出擊去到盡，夏薩特、法比加斯同迪亞高哥斯達呢個攻擊鐵三角夠晒煞食，聽朝對住只得「獨行俠」蘇亞雷斯一個孭飛嘅巴塞，相信繼續可以食住對家，博2.5倍主勝。（有線61及201、廣東體育周三早上8:05直播）

車路士喺國冠盃首戰輸畀紐約紅牛B隊之後，莫連奴即刻躁咗，前日派遣最強陣容出戰，最終都做番齣好戲，互射12碼砌低PSG，贏波過程雖然唔算精彩，但睇得出班「藍戰士」吓吓去到盡，好似「迪哥」咁吖，上仗鬥PSG幾乎同對方守將奧里亞開片咁滯，鬥心同獸性都返晒嚟咁款喎！
寸王國冠盃出強陣

查實睇番車仔輸畀紅牛嗰場波，上半場都係夫添出擊，只係到換邊後先用後備，反映「寸王」根本冇留手，想盡快磨利隊波，去到前日就仲堅，泰利、法比加斯、夏薩特、「迪哥」等幾件星級主將，都係踢到70分鐘打後先被換走，新兵法卡奧亦喺上仗為「藍戰士」處子登場，雖然未有士哥，但表現總算不過不失，昔日「老虎」同「迪哥」喺西甲入巴塞唔少波，配合埋夏薩特同法比仔校炮，想冇士哥都難啦！
巴塞近7次對賽未贏過

對家巴塞喺國冠盃表現麻麻，首戰鬥銀河險勝2:1，跟住面對半力曼聯，更加衰到輸1:3收場，證明美斯同尼馬兩大射手缺陣，單靠蘇亞雷斯孭飛根本信唔過，況且中路守將華美倫上季大部分時間都係坐後備席，聽朝點頂得住迪亞高哥斯達呢架「坦克車」吖！睇埋往績，雙方近7次交手，巴塞原來未贏過車路士，家陣美斯同尼馬仲放緊假，睇怕都好難惡得出樣咯！