堤格雷斯拔「河」響頭炮

猪拉多纳

自由盃決賽首回合

墨西哥奇兵堤格雷斯勇闖南美自由盃決賽，首回合喺主場先鬥阿根廷勁旅河床。咪以為河床贏梗呀，事關佢哋喺分組賽兩次對堤格雷斯，都只係和波，睇嚟絕對唔嘢小！既然堤格雷斯有主場之利，一於撐2.05倍主勝響頭炮啦！（開賽時間：周四早上9:00）

喺自由盃踢得勁順嘅堤格雷斯，4強對住巴甲國際體育會，首場雖然輸1:2，但係次回合返到主場贏3:1，兩回合以4:3反勝對手殺入決賽，更何況唔計上仗聯賽特登留力，佢哋喺再對上3戰都入咗6粒，火力夠晒保證。

仲有呀，除咗巴西前鋒拿費爾蘇比斯勁fit之外，仲有法國好波之人基格納。呢件6月加盟嘅法國前鋒步大力雄，踢法全面，制空力亦有番咁上下。佢喺4強次回合開齋幫隊波進身決賽，對河床嚟講絕對係一大威脅，有佢在陣，堤格雷斯要成為首支墨超球隊捧起自由盃，唔係冇可能。
河床近2戰交手不勝

另邊廂嘅河床雖然近6戰不敗，但中場比斯古尼治、比托羅腿傷唔出得，射手杜費路古迪利斯離隊，實力大減。最關鍵係佢哋喺分組賽對堤格雷斯兩場都贏唔到，睇怕今戰遠征墨西哥都難全身而退。