皇馬着火AC當災

猪拉多纳

國冠盃「中國站」收爐一戰，皇馬家德里會喺上海激鬥AC米蘭，心水清嘅朋友應該記得呢兩隊喺上年年尾先至對陣過，當時喺各項賽事保持22場連勝、向住世界紀錄進發嘅皇馬竟然喺杜拜挑戰盃以2比4不敵實力麻麻嘅AC，真係令人O爆嘴。不過今時唔到往日，皇馬依家狀態着晒火，今場更排出強陣，誓要射爆AC，科娜推介讓球主勝！（有線61、64、201及203台周四晚8時直播）
強陣出擊矢志復仇

皇馬喺國冠盃首場贏唔到羅馬，但跟住兩場分別大炒兩大豪門曼城同國際米蘭4比1及3比0。雖然話熱身賽未必可以見到新帥賓尼迪斯夠唔夠料帶「銀河艦隊」，但「肥賓」對待呢項賽事至少夠認真，對曼城同國米都有派強陣應戰，C朗、加里夫巴利、卻奧斯、艾斯高呢啲主力均有正選上陣，上仗連占士洛迪古斯亦已歸隊，結果「銀河艦隊」不但以質取勝，仲谷起晒狀態，依家班波着晒火，面對正在重建嘅AC米蘭，真係未驚過。

記得皇馬去年輸畀AC嗰一仗，時任主帥安察洛堤嗰陣將巴利、賓施馬同占士洛迪古斯全部收起做後備，結果因輕敵而輸波，今仗精銳盡出，睇嚟復仇有望。
積弱多年 紅黑軍仲有排執

AC今夏有泰國富商入主，7月初先至豪掟3,000萬歐元（約2.57億港元）買入哥倫比亞前鋒卡路士巴卡，再花800萬歐元（約6,900萬港元）簽下巴西籍射手雷斯阿祖安奴。但其實「紅黑軍團」積弱多年，內部問題一籮籮，真係唔係一時三刻，靠一個夏天轉會市場就可以扭轉頹勢、復興霸業，連新教頭米赫洛域都承認隊波有排執同未夠班贏取意甲冠軍，今場對住實力超班嘅皇馬，應該幾難爆冷。

另皇馬前鋒賓施馬今場雖然並冇隨隊，不過由J神、巴利同C朗合組三叉戟攻堅，火力依然超級威猛，讓球主勝可捧。