曼城齊「架生」等比帥發功

猪拉多纳

曼城上季衛冕失敗，就連歐聯、足總盃同聯賽盃幾條戰線都晨早Game Over，手執「億萬大軍」一隻盃都冇，領隊比歷連尼份工梗係危啦！一直盛傳哥迪奧拿下季會空降曼城，仲有1年就約滿嘅比歷連尼，今季絕對係救贖最後機會！

呢位智利「工程師」季前收到好消息，就係「藍月亮」獲歐洲足協撤銷財政限制，隨即貫徹燒錢本色以天價4,900萬鎊（約5.9億港元）羅致史達寧，加埋阿古路、耶耶托尼同大衞施華等高質球星，「架生」就齊晒，睇吓比帥功力去到邊嘞。