聖日耳門瓣瓣贏晒里

猪拉多纳

法甲開鑼前先進行法冠盃大戰，由上屆法甲冠軍對法足盃盟主，但由於聖日耳門上季包辦兩項錦標，故改由法甲亞軍里昂上陣。PSG剛喺美國踢完國冠盃，跟住移師到加拿大蒙特里爾踢法冠盃，適應上佔優，加上里昂早前喺酋長盃嘅表現差勁，今仗遠赴加拿大都係等做「炮灰」，PSG讓半一照捧上盤。（周日凌晨3時開賽）

PSG上季橫掃法國球壇，囊括法甲、法足盃同法聯盃冠軍，歷史性成為3冠王，球隊季前人腳變動唔大，只有中場卡比耶離隊，之前一直盛傳會被挖角嘅兩大前鋒伊巴謙莫域同卡雲尼最終留低，令球隊進攻火力得以保持。PSG早前喺國冠盃先後擊敗賓菲加同費倫天拿、打和車路士後再勝曼聯，足證球隊狀態甚弗。

此外，PSG陣中一班征戰美洲盃主力如堤亞高施華、大衞雷斯以及卡雲尼等，都喺國冠盃後期歸隊並有上陣，陣容狀態唔使懷疑，加上喺北美已逗留了一段時間，已完全適應當地環境，天時地利佔盡優勢。
里昂熱身賽表現差

里昂今季更保留咗大部分主力，但近年經常受傷患困擾嘅中場指揮官哥古夫，因不獲球會續約已經離隊。里昂喺季前熱身賽嘅表現麻麻，上周末喺倫敦出戰酋長盃，竟然兩戰全敗，不但零入而且狂失8球，當中0比6慘負於東道主阿仙奴嘅表現實難以令人接受。上季法甲神射手拿卡錫迪雖然仍在陣中，但正受到多支球隊斟介，大有可能於稍後離隊，呢個消息對近況平平嘅里昂嚟講絕非好事。里昂今仗要由倫敦轉戰加拿大，舟車勞頓下料難有佳作。估計PSG今仗最少可以贏一球，上盤可捧！