波圖史篤城未執掂獻細

猪拉多纳

德甲球隊科隆搞嘅「Colonia Cup」嚟到第二日賽事，葡超球隊波圖會對英超球隊史篤城。波圖同史篤城今夏都有唔少主力離隊，同時亦招攬咗唔少新球員加盟，喺需要時間磨合嘅情況下，今仗交手未必會多入球，阿謙推介細盤。

（TVB 302周日晚11時45分直播）

波圖今夏有多名星級球員離隊，當中以轉投馬體會嘅前鋒積臣馬天尼斯同加盟皇馬嘅後衞丹尼路雷斯對球隊影響最大。波圖雖補入咗華歷簡奴前鋒貝爾奴、馬賽中場恩保拿、賓菲加後衞彭利拿同皇馬門將卡斯拿斯，但球隊突然多咗咁多新球員，重新磨合需時。波圖近期熱身賽面對德甲嘅慕遜加柏同史浩克04都贏唔到，證明呢班波狀態唔弗之外默契亦麻麻，今仗面對史篤城相信唔係咁易贏到。

史篤城今夏走咗唔少球員，其中中場柏拉西奧斯、尼桑斯及門將比高域嘅離隊影響甚大。史篤城雖然補入咗漢諾威前鋒祖斯盧辛馬田、巴塞翼鋒阿費利、利物浦後衞格連莊臣、利華古遜後衞禾爾舒捷特同維拉門將基雲，但始終有唔少新兵在陣，所以喺早前嘅熱身賽表現麻麻，今仗面對波圖相信都唔會踢得進取，一於捧細盤。
科隆硬淨頂實華倫

另一場科隆主場對華倫西亞，科隆主場向來唔差，上季聯賽主場攞到四勝九和四負，不敗率高達七成，加上只有安東尼烏查同奇雲希馬離隊，對球隊影響實屬有限，面對剛以接近一億歐元增兵，需要時間磨合嘅華倫西亞，有望藉主場之利力保不失，受讓值得捧場。