車仔平手秤「仙」

猪拉多纳

寸王恰死雲格

英格蘭社區盾今晚喺溫布萊球場上演，阿仙奴同車路士合演「倫敦打吡戰」。係人都知「兵工廠」領隊雲格勁憎車仔教頭莫連奴，肯定會諗計仔報仇，但「廠長」唔止口水仗打輸，上季仲冇品到郁手推人兼拒絕握手，簡直畀「寸王」食住晒，難怪莫連奴話「贏阿仙奴好正常」啦，今場開平手盤，一於撐1.76倍嘅車路士啦！

（有線61、64、201及203周日晚10:00直播）
近13次對賽 雲格未贏過

阿仙奴喺季前熱身賽4戰全勝，包括重奪酋長盃冠軍，而且保留番上季個食胡陣容，再加多個門神施治倒戈把關，睇落真係幾勁。不過咁，王牌阿歷斯山齊士仲未歸隊，始終會影響「兵工廠」嘅火力，而且佢哋每次對車仔，都會變成好睇唔好食，所謂華麗進攻，對住「豪華大巴」根本冇用。

事實上，近年雲格遇親車仔都輸到失控，佢試過被莫連奴寸唔識拎冠軍，隔空開火鬧交，上季阿仙奴作客以0:2不敵車路士，「教授」更加嬲到當眾用手推「寸王」。鬼咩，雲格近13次同莫連奴「私片」1鋪都未贏過，賽前莫帥又發功，嗌佢老人家反省吓喎！

咁都未算寸爆，莫連奴仲話，覺得車仔贏阿仙奴好正常，贏波都唔會有咩特別感覺喎，睇得出佢完全冇將對手放喺眼內，淨係呢份自信同霸氣，都值得捧場啦，就算車仔喺熱身賽表現普通，依然撐得過，特別係中場夏薩特已經上力，對住巴塞都1個扭4個，有佢加埋迪亞高哥斯達，唔使擔心冇波入喎。
戰車保留陣容一撻即着

或者大家會覺得，車仔新簽嘅射手法卡奧同中場羅拔堅尼地未必即刻打到正選，但正因為咁，相信車仔唔需要用太多時間去重新磨合個陣，季初已經可以撻着。講真，莫連奴未必好恨拎社區盾，但佢肯定唔想衰喺雲格手上，平手捧車仔好正路。