費倫砌車贏心態

猪拉多纳

話咁快國際冠軍盃嚟到尾聲，今晚北美及歐洲站最後一場，車路士坐鎮主場迎戰意甲勁旅費倫天拿。車仔啱啱失落社區盾狀態一般，箭頭迪亞高哥斯達仍有傷在身，嚟緊周末英超又開鑼，主帥莫連奴最識計數，點會喺呢類無關痛癢嘅「拍跳」搏殘自己，「紫百合」挾住剛贏巴塞嘅氣勢，無懼怕傷hea踢嘅車仔，仲有得受讓力撐讓球客勝。（有線62、64、202及203台周四凌晨3時直播）

今夏車仔送走淪為後備嘅老臣杜奧巴及施治，只係對位引入法卡奧同比高域填補空缺，對整體實力冇乜提升，明顯主帥「寸王」莫連奴仍倚重「迪哥」迪亞高哥斯達、夏薩特、法比加斯等上季重奪聯賽錦標嘅功臣。雖然以不變應萬變唔係壞事，但從日前喺社區盾一球輸畀阿仙奴，睇得出班波仲未上力，尤其係嗰場「迪哥」續因傷缺陣下，「寸王」無論用雷米定法卡奧，均欠缺「迪哥」於前線嘅威懾力，法卡奧更延續上季喺曼聯曳爆表現，睇見都眼冤。
車路士留力周末英超

由於英超嚟緊周末開咧，車仔要硬撼唔易啃嘅史雲斯，莫連奴當然唔會為無關痛癢嘅國冠盃而搏甩髀，預計會收起仍未好番嘅「迪哥」同其他主力，讓域陀摩西斯、古達度、葛特蘇馬等副選披甲，實力差一截之餘，「寸王」亦唔想手下有乜損傷，心態咁hea又點會踢得好呀？
費倫贏完巴塞弗到震

費倫天拿今季改由保羅蘇沙接替「飛機仔」蒙迪拿執掌帥印，雄心壯志欲爭取佳績，上仗國冠盃面對巴塞，儘管「地上最強」嘅「MSN」鋒線只得蘇亞雷斯擔大旗，但全場依然佔盡優勢，可惜仍以1比2不敵「紫百合」，其中身穿10號波衫嘅新仔貝拿迪斯治更梅開二度響朵，認真叻仔。除此之外，費倫嘅西班牙孖寶保查華利路同祖亞昆仲好弗，睇準時機打反擊非常煞食，「紫百合」連巴塞都KO，又點會怕無心戀戰嘅車仔呢？讓球客勝有買趁早。