河床爭自由盃搏殺「格」

猪拉多纳

河床聽朝會喺布宜諾斯艾利斯恭候堤格雷斯，進行自由盃決賽次回合賽事，河床前鋒卡雲拿基Fit到漏油，由佢拍住沙維奧拿攻堅，相信主帥加拿度可以喺觀眾席「印印腳」等捧盃，讓半一梗係捧2.03倍上盤啦！（開賽時間：周四早上9:00）
堤格雷斯後防缺大將

19年前，加拿度以球員身份協助河床勇奪自由盃，19年後嘅今日當然想重溫好夢。河床喺首回合作客0:0逼和堤格雷斯，加拿度就因為鬧第4裁判被逐，今仗要聯同養緊傷嘅烏拉圭射手洛迪高莫拿齊齊做觀眾，幸好佢哋件射手卡雲拿基近4場波勁入5球，新加盟嘅沙維奧拿亦表現對辦，河床捧盃機會依然高唱入雲。

同人唔同命，阿根廷足總錫住河床，將佢哋原定上周末鬥防衞者場波延期，相反墨西哥足總就理得你死，要堤格雷斯踢埋對莫雷利亞場墨超先踢今場關鍵大戰。睇番堤格雷斯首回合佔盡地利一樣冇碇埋手，今鋪作客兼有後防大將曉高艾耶拉傷埋，想成為首支捧走自由盃嘅墨西哥球隊？難啲喎！（首回合：河客和0:0）