中國北韓半和抵玩

猪拉多纳

政治足球面子攸關

今日兩場東亞錦男足賽事，全部帶有濃重政治味道，尤以中國對北韓為甚，呢種面子之戰比較難玩，要博就博1.95倍半場和，事關大家前橛都唔敢太冒險，多數穩中求勝。（now633台周三晚9:00直播）

以捧盃為目標嘅中國男足，首戰落筆打三更0:2輸畀年輕球員為骨幹嘅南韓，從鬥志、技術層面都係完敗，佢哋嗰場波踢咗60分鐘至有第一腳中框射門，全場加埋只跑咗106公里，比起「太極虎」班生牯仔少成11公里，射門次數得對手三分之一，控球率亦少成12個巴仙。由呢批數據睇到，中國唔單只技不如人，連跑動嘅意欲都好低，咁踢條鐵咩！

基於班國腳唔少人係帶傷作戰，好似馮瀟霆、吳曦都係咁，搞到鄭智要改踢中堅，中國隊班球員明顯唔多肯去盡，體育總局足管中心主任魏吉祥前日就專登探班訓話，要求啲國腳要有愛國意識，打出血性，但係訓完話可唔可以改變佢哋嘅心態呢？冇人敢寫包單。
北韓「政治勝利」大過天

最重要係北韓上場反勝日本2:1之役，呢場波喺佢哋眼中變咗係政治上嘅一次勝利，官方嘅《勞動新聞》話「首戰告捷為全國人民同軍隊，帶嚟無比嘅力量」，以北韓嘅標準，政治勝利係必須延續嘅，佢哋今日讓路畀中國老大哥嘅可能性比較低，就算讓都留下半場先吖，國足半場想攻陷佢哋唔容易。
日韓「細」均力敵玩埋半和

早場日本對南韓表面睇政治味道冇咁強，不過「太極虎」次次對親「藍武士」都會死砌，畢竟兩國歷史上嘅牙齒印，同中日一樣咁深。雖則南韓今次隊波平均年齡得24.3歲，但係李在成、金承大、李庭協、李宗浩幾個都踢得有板有眼，對住首戰同樣唔多願郁嘅二線日本男足，未必會處於下風，絕對係勢均力敵，1.9倍半和同1.48倍入球細，都係合理選擇。（now633台周三晚6:20直播）