韋斯咸無帥殘陣撐艾斯特拉

猪拉多纳

今晚以歐霸盃第三圈外圍賽次回合為主打，大部分名牌都喺首回合取得領先優勢，唯獨英超韋斯咸甩拖，主場被羅馬尼亞球隊艾斯特拉逼和2比2，更大鑊係領隊比歷攞紅牌，今仗唔可以喺場邊指揮大軍，加上射手安拿華倫西亞受傷，守將占士哥連斯停賽，今仗作客讓唔起艾斯特拉，阿King捧讓球主勝。（周五凌晨2時開賽）

韋斯咸僅以「公平競技獎」取得歐霸盃席位，因此表現力有不逮，經常以超技術阻止對手進攻，踢五場歐霸盃已有三位球員被逐，包括首回合嘅占士哥連斯。新帥比歷似乎已黔驢技窮，首回合忍唔住發脾氣向球證出言不遜，最終攞紅牌今場停賽，加上安拿華倫西亞受傷長抖，中場祖爾奧拜恩亦傷出；換言之，韋斯咸今場無帥兼缺少三位主將，形勢絕不樂觀。

艾斯特拉有兩粒作客入球在手，今場打和0比0或1比1都可以晉級，估計會屯重兵加強防守再打突擊。值得一提，艾斯特拉上圈淘汰蘇超球隊恩華尼斯，對付英倫三島球隊似乎特別有計，今次主場更加唔怕韋斯咸。
修咸頓留力英超吼細

另外修咸頓首回合大勝荷甲維迪斯3比0，晉級唔成問題；由於英超將於周末開鑼，預料修咸頓會留有一手，無謂踢殘班球員，一於捧細盤。德甲多蒙特由杜曹接手執教後，頻頻盡數對手，希望建立口碑鞏固帥位，佢哋首回合只係小勝奧地利球隊禾夫斯貝加1比0，今仗返回主場，應會力爭入多幾球。