紅魔頭炮火熱爆發

猪拉多纳

嘩嘩嘩，英超返嚟喇！經過兩個多月抖暑後，球迷等到頸都長嘅全球最受歡迎、燒錢能力最高嘅英超聯賽，今晚終於熱爆開鑼，揭幕戰更上演重頭戲，由上季「四哥」曼聯主場火併強敵熱刺。紅魔送走老將尹佩斯同「瘟神」迪馬利亞，並豪使逾8000萬鎊挖來迪比、舒尼達連等猛將，主帥尹戈爾嘅奪冠野心路人皆見，仲着晒靚靚新火紅戰衣登場勁sharp醒，面對堅飄忽嘅熱刺有力旗開得勝，曼聯主場讓半一，斯維強捧上盤。

（now 621周六晚7時45分直播）
豪花10億野心勃勃

貴為戰術大師，曼聯主帥尹戈爾經過一季後已摸熟英超同自己班波，送走跌晒Watt嘅尹佩斯同拉菲爾達施華，果斷出售唔適應英超嘅標王迪馬利亞，更勁使8310萬鎊（約10億港元）簽入迪比、達美安同「大小S」舒韋恩史迪加、舒尼達連等實力派，淨係後兩者已徹底強化積弱多年嘅中場，雖然「小豬」舒韋恩史迪加及馬高斯盧祖未弗未必出得，受轉會困擾嘅鋼門迪基亞肯定冇正選，「爆炸頭」費蘭尼亦要坐越季波監，但朗尼、艾舒利楊格、桑馬達、迪比等都弗，紅魔於季前「拍跳」連贏CF阿美利加、聖荷西地震同巴塞隆拿，只係輸過畀聖日耳門，狀態同信心正不斷冒升，對住熱刺都冇有怕。今仗亦係曼聯首度披上新球衣贊助商「三間牌」嘅新波衫比賽，着晒靚靚波衫落場分外sharp醒。
熱刺防線曳表現飄忽

熱刺年年話爭歐聯入場券，但除咗09-10年球季外冇季做到，前線只得上季爆出嘅哈利卡尼靠得住，另外兩名前鋒艾迪拜約同蘇爾達杜走晒樣兼有離心，而且呢班波不嬲防守唔掂，上季仲失咗53球，今夏買入比利時後衞艾達韋列特亦唔幫得幾多。熱刺雖然喺日前奧迪盃季軍戰擊敗AC，但再之前輸過畀皇馬同美職明星隊，其中不敵後者最為肉酸，表現咁飄忽，門神洛里斯又未好番，作客志切打響頭炮嘅曼聯難有運行，上盤乃不二之選，進取啲嘅不妨買埋讓球主勝。