祖記三大新箭搶頭功

猪拉多纳

速食王今日首次同大家見面，本欄主力推介半場主客和、半場大細、第一隊入球，博盡快收錢。頭炮搵來喺上海舉行嘅意大利超級盃，祖雲達斯對拉素。祖記上兩屆都迅速打開紀錄，球隊今季簽下3位射手文迪蘇傑、保羅戴巴拿、施蒙尼沙薩，3人為爭正選，必全力數胡，捧祖雲達斯1.68倍「第一隊入球」。（周六晚8時開賽）

雖然祖雲達斯放走泰維斯，但新加盟嘅文迪蘇傑、保羅戴巴拿、施蒙尼沙薩，級數不亞於呢位阿根廷前鋒。身材高大嘅文迪蘇傑以往効力禾夫斯堡、拜仁慕尼黑、馬體會，都屬於高產射手，至於21歲嘅阿根廷新星保羅戴巴拿上季為巴勒莫攻入13個意甲入球，踢法酷似阿古路，加上意大利新紮國腳施蒙尼沙薩，呢條鋒線可塑性更高。

由於3人新加盟，肯定會交足功課爭正選，即使艾華路莫拉達因傷缺陣，祖記鋒線仍然夠殺。值得一提，祖記上兩屆踢意超盃，都係上半場先開紀錄，上屆更加開波5分鐘已領先，表現搶韁。
上海鬥拉素 吼「第一隊入球」

拉素月中要踢歐聯附加賽，估計唔會太落力，避免出現傷兵問題，而且佢哋兩年前意超盃，試過吞祖記4蛋，上季聯賽亦被對手「雙殺」，兼入唔到波，同埋都係上半場已失波，祖雲達斯「第一隊入球」抵玩。