藍戰士未撻行火 主場燜天鵝肉僅熟

猪拉多纳

雷米唔夠卡 老虎狀態差

英超今晚終於回歸，開鑼日又點可以少咗衞冕冠軍車路士先？佢哋今晚將會喺主場迎戰史雲斯，雖然「藍戰士」過去一路食住對手，之不過呢鋪佢哋好大機會冇咗射手迪亞高哥斯達幫手，想整碟「爆炒天鵝肉」益球迷睇怕唔係咁容易，「寸王」莫連奴隨時又再上演拿手好戲，煲魚生粥小勝一粒收貨，3.4倍「讓球和」值得一試。 （now621台周日凌晨0:30直播）

車路士對上5次迎戰史雲斯錄得全勝紀錄，上季仲分別以4:2、5:0大數對手，呢次開咧再次遇上送分童子，相信都實食冇黐牙。雖然班波今季暫時仲係冇乜大收購，但咁樣反而代表球隊陣容變化唔大，班波唔需要額外花時間適應同培養默契，呢點對佢哋喺季初搶分非常有利。
迪哥受傷未必踢得

不過講到要大數對手，雷法爾就有所保留，事關「屠鵝高手」迪亞高哥斯達大腿受傷，領隊莫連奴都話要到賽前一刻先至知佢究竟踢唔踢得，就算佢可以夾硬復出，相信狀態都唔慌好得去邊。需知道呢位前鋒上季兩鬥史雲斯夾埋轟入5球咁多，今次車仔冇咗佢幫手數胡，無論改用卡士一般嘅雷米，抑或狀態麻麻嘅法卡奧擔正，怕且都未必夠火氣炒起對手囉。

對手史雲斯今季最叻係冇畀人拆骨，球會今夏先同領隊蒙克續約3年，又成功留住前鋒巴菲迪比高美斯、中場奇誠庸、中堅艾殊利威廉斯等三線主力，日前仲同門將法比安斯基續約4年，加埋新加盟嘅馬賽射手阿休，呢班波今季實力計落有增無減。弊在佢哋對親車路士例牌衰腳軟，況且佢哋喺上季開鑼日就試過作客打贏曼聯2:1，相信「寸王」今晚一定會嚴陣以待，隨時贏一粒就收手，想整多鋪驚喜畀球迷好難喎。