斑馬兵團星散唔掂檔 「藍鷹」下盤制得過

猪拉多纳

數據呢啲嘢係用嚟破嘅，就算拉素近17次對祖雲達斯贏得1次，今晚喺上海體育場硬撼呢隊剋星都冇有怕！「藍鷹」提早兩日空降上海備戰意大利超級盃，可望揮低今夏有大批主力離隊嘅「斑馬兵團」，受讓平半要下盤。

拉素比祖雲達斯早兩日抵達中國，目的就係想盡早適應天氣同時差，陣中嘅荷蘭守將迪維積賽前話，全隊上下都唔甘心近年畀「斑馬兵團」食住，所以成班手足緊張呢場波仲多過嚟緊嘅歐聯外圍賽附加賽，證明拉素係幾咁有鬥心。
提前到上海備戰

老實講，拉素想威番鋪嘅話，今晚真係黃金機會，事關祖雲達斯季前「大失血」，派路、維達爾同泰維斯統統離晒隊，新加盟嘅防中基迪拉又傷埋，你估保羅普巴真係曉飛咩？唔係話新加盟嘅箭頭文迪蘇傑同保羅戴巴拿唔勁，但初嚟埗到，磨合都要時間啩，點睇都讓唔起磨刀霍霍嘅拉素。