尼斯 摩納哥 「大」打天才波

猪拉多纳

法甲首周賽事就有場「蔚藍海岸打吡」，摩納哥會用30分鐘車程去作客尼斯，2.4倍入球大值得捧場！上季摩納哥靠防守攞咗法甲季軍，不過佢哋今個暑假放走頂級防中干度比亞，最強嗰瓣防守肯定大打折扣，不過轉頭簽咗意大利前鋒艾沙拉維，佢喺周中歐聯外圍賽炒年青人一仗已經入波，加上巴西20歲新星貝拿度施華彈起後愈踢愈好，摩納哥今季隨時轉型玩攻擊添！

摩納哥有「小法老」艾沙拉維，主隊尼斯亦有個賓艾化，呢兩個球員都屬於「沉淪天才」，今季齊齊嚟到法甲博翻生。賓艾化當年同賓施馬齊齊上位，球技絕對唔使懷疑，不過去到英超受傷患困擾愈踢愈沉，但唔好忘記佢只係28歲，尼斯今季買重佢反彈，賓艾化當然要好好把握機會，今場一於同艾沙拉維鬥數胡，睇吓邊個率先重生！（TVB301台周日凌晨3:00直播）