兵工廠弗爆扑錘

猪拉多纳

今晚英超頭場之一爆發倫敦打吡，氣勢如虹嘅阿仙奴主場迎戰「錘仔幫」韋斯咸，「兵工廠」未開咧連贏3項獎盃，信心爆晒棚，主帥雲格講到明季初唔可以再甩轆，相反韋斯咸傷兵成籮之餘，啱啱仲喺歐霸外被踢出局，作客「剋星」阿仙奴難有運行，不妨直取讓球主勝。（now 621周日晚8時30分直播）

阿仙奴喺季前連奪英超亞洲挑戰盃、酋長盃同社區盾，雖然話呢類「拍跳」成績唔好太認真，但從上仗社區盾戰勝車路士，睇得出班「廠仔」明顯操到弗晒。查實阿仙奴依家只得韋碧克、路斯基同韋舒亞三名傷兵，影響不大，因為中前場仲有奧斯爾、基奧特、禾確特、阿歷士張伯倫等大把人用，主帥雲格亦吸取上季出閘脫腳嘅教訓，為咗爭標，佢老人家已落晒柯打話季初絕對不能鬆懈，盡力搶分開個靚頭。
韋斯咸殘陣作客等劏

韋斯咸踢走「大Sam」艾拿戴斯後，搵嚟舊將比歷接手執教，希望一改「大Sam」高Q大棍打法，重拾漂亮足球。但季初表現唔多掂檔，尤其歐霸盃外圍賽作客以1比2輸畀弱旅艾斯特拉，兩回合計輸3比4出局，儘管「錘仔幫」嗰場收起多名主力，不過佢哋由第一圈開始參賽，成班波未開咧踢到殘晒，前鋒安拿華倫西亞更重創要抖3個月，安祖卡路爾同中場祖爾奧拜恩亦未好番，況且之前10次對阿仙奴都輸晒，當中更有7次輸兩粒或以上，今仗難逃遭大炒惡運，阿仙奴嘅讓球主勝值得捧場。