廣島獵鹿大陣仗

猪拉多纳

日職次爭霸重頭戲

東亞錦標賽告一段落，日職馬上開快車，今日最具瞄頭嗰場，應該係廣島三箭對鹿島鹿角，廣島踏入次階段踩行油5連勝，理論上o趙鹿島唔難，但係個主W有成2.12倍略嫌唔夠熱，建議改玩1.68倍入球大保險啲。 （有線61、201台周三晚6:00直播）
森保一：「次階段攞40分」

今季日職改咗制，浦和紅鑽率先攞咗首階段冠軍，入梗季後賽，以日本人鍾意高潮嘅習慣，次階段浦和應該冇咁易贏埋，肯定有另一隊捧盃，等個季後賽熱熱鬧鬧搞得成。如果一切按劇本進行，咁廣島無疑係機會好大嘅一隊，佢哋响次階段5連勝開咗個好頭，拋離次席嘅名古屋、川崎同鹿島5分，今日只要隊低埋鹿島，好大可能响半季內，就實現到主帥森保一「次階段攞40分」嘅基本目標，爭標把握好大，所以人人都當今場係次階段嘅爭霸重頭戲。

以走勢嚟講，廣島的確勁到無倫，5場W晒勁入18球，開咗2次其他波膽，鋒將佐藤壽人仲攞埋7月嘅MVP，頂替傷兵柴崎晃誠嗰件細路野津田岳人，响中場攻守兼備，令廣島成隊波踢起嚟更加有活力，按理獵「鹿」冇乜難度。
鹿島鋒將甸尼爾完成註冊

奇就奇在廣島走勢靚兼有主場之利，主勝竟然有2.12倍，唯一解釋係佢哋往績冇優勢，17次主場對鹿島只得7勝2和8負。係咪咁簡單呢？似乎又未必喎，鹿島响炒咗施里蘇，改由石井正忠擔任監督之後已經兩連勝，士氣起番晒，而且中場柴崎岳復出，鋒線巴西援兵甸尼爾又完成咗註冊，隨時可以落場搏殺，重上正軌嘅鹿島，絕對有條件同廣島對攻，輸都要轟轟烈烈，開大並唔奇怪。