紅魔齊心「維」毆沙包

猪拉多纳

大佬朗尼拍心口補鑊

英超今晚又有好戲睇，阿士東維拉喺主場對曼聯，唔值得冷敲。雖然紅魔喺開咧戰贏得唔夠霸氣，隊長朗尼又錯過兩次入球黃金機會，但佢曾經拍心口保證，今季回歸正箭頭位置，至少要攻入20球，打破曼聯史上最多入球紀錄，信佢補到鑊就揀2.6倍「讓球客勝」啦！（now621台周六凌晨2:45直播）
佐敦阿休難做救世主

維拉賣走賓迪基後，簽咗羅連安特嘅佐敦阿休補充前線火力，不過佢嘅職業生涯入面，只得上季表現似樣啲，唔似做到救世主，難怪舒活周圍放風話要再買人，加上維拉近12次對曼聯得3和9負，畀人恰到上心口，領隊舒活上任後首次領軍對曼聯，又試過輸1:3，今場被炒起唔奇。

事實上，曼聯喺開咧戰主場靠個烏龍波，以1:0砌低熱刺，收起「神龍」迪基亞都能夠保持不失贏波，上季經常大意失波嘅場面，應該會減少。另一方面，朗尼上星期兩次敗家固然抵鬧，但佢只要再入20球，就會超越球會傳奇卜比查爾頓嘅紀錄，累積250球成為紅魔史上入波最多球員，試問佢點會唔搏呀？
歐聯抽好籤唔使留力

最重要係，曼聯喺歐聯附加賽抽到好籤，對手只係比利時嘅布魯日，根本無必要收起晒啲正選去留力，而且大家應該會發現，紅魔領隊尹戈爾份人完全唔講情面，邊個得罪佢都冇運行，依家曼聯位置競爭激烈，相信佢哋啲球員唔敢揸流攤，即係話維拉隨時又變成沙包任砌囉！