畢爾包+2讓客起「塞」

猪拉多纳

擺鐵桶陣誓破錦標荒

大拿拿落後4球，你話追就追呀？西超盃次回合今晚移師魯營上演，巴塞隆拿主帥安歷基信有奇迹，睇好班波可以後來居上捧盃，大想頭咗啲喎！畢爾包球員唔係雪糕筒，捧2.65倍「+2」嘅「讓客」，見證呢支巴斯克球隊打破31年錦標荒。（now632台周二凌晨4:00直播）

巴塞首回合淨吞4蛋，教練安歷基口口聲聲話會承擔責任，實則就唔忿氣，賽前表明會沿用首回合正選人腳再鬥畢爾包，即係話碧基繼續做後備，由冇態嘅華美倫搭住經驗一般嘅馬斯巴查鎮守中路，騰騰震嘅沙治羅拔圖就出任中場，咁嘅中後場想頂得住馬高蘇沙亞達同阿度里斯嘅進襲？咪玩啦安歷基！

安歷基死要面，Lead住4球嘅畢爾包就實際得多。主帥華爾維迪表示，去到魯營預咗惡踢，唔排除會搵番防守力較佳嘅隊長古柏治擔正，加強掃蕩能力。畢爾包對上一次捧盃，已經係1984年嘅事，家陣爭個半鐘就可以時隔31年之後就捧盃，老虎蟹都頂住。