銀河弗爆遇通體會起筷

猪拉多纳

各位球迷今日除咗睇歐聯附加賽之外，亦要留意聽朝中冠盃，呢項賽事不乏球星，D組洛杉磯銀河主場對危地馬拉球隊通訊體育會，當然要捧有謝拉特及羅比堅尼助陣嘅銀河。呢支美職勁旅喺呢組超晒班，近況亦好勇猛，大勝冇難度，阿King揀選洛杉磯銀河讓球主勝，作為過關首選。

（周三早上10時開賽、馬會網上文字直播）

謝拉特加盟銀河後，成為美職焦點，但論表現，另一位前英超球星羅比堅尼更加搶眼，呢位愛爾蘭鋒將今季美職已轟入13球，包括上仗梅開二度，銀河亦取得4連勝，全隊狀態處於巔峰，所以即使上輪中冠盃收起謝拉特同羅比堅尼，亦一樣大炒千里達球隊FC中央5比1。以銀河目前勇態，就算半力出擊，都夠力炒起通訊體育會，一旦兩位球星上陣玩番兩腳，隨時贏得更多。
堤格雷斯靠基格納食胡

B組墨西哥球隊堤格雷斯主場對薩爾瓦多球隊梅塔帕，堤格雷斯兩個月前簽下馬賽射手基格納，令人大感意外，呢位法國國腳亦顯身價，上仗聯賽大演帽子戲法，助堤格雷斯大勝基亞帕斯美洲虎4比1，以梅塔帕嘅數級，相信頂唔住基格納，同樣要讓球主勝。

另外，南美球會盃第1圈次回合，可留意玻利瓦爾，呢支玻利維亞球隊雖然首回合作客吞烏拉圭球隊迪芬沙士砵亭3蛋，但佢哋擁有「高原主場」優勢，今仗返回自己地頭，應該可以贏番場。