(日)30 愛華頓 vs 曼城 愛華頓曼城對攻

猪拉多纳

盧卡古阿古路獸性大發

曼城喺上輪英超威水到震，3比0大炒強敵兼衞冕車路士，呢支榜首隊伍今晚作客愛華頓，「拖肥糖」開局唔錯，兩戰1勝1和得4分，仲好過未開齋嘅車仔，加上雙方兩隻「怪獸」王牌「小魔獸」盧卡古同「阿古獸」阿古路都弗，今場首選入球大！（now 621周日晚11時直播）
史達寧激活藍月亮鋒力

愛華頓領隊馬天尼斯上季最為人詬病嘅，就係一直堅持控球同主攻，搞到球隊唔識防守，最尾僅以11名完成球季。今季首戰都未有改善，對住升班嘅屈福特都失兩球，好彩上場作客修咸頓憑盧卡古發威梅開二度，加上巴克里嘅入球大炒「聖人」。不過「拖肥糖」今場對手冇咁易對付，曼城連贏兩場3比0後士氣高昂，史達寧為「藍月亮」注入活力同速度，幫手拉開對方防線，令阿古路同大衞施華有更多空位射波同交靚波。

雖然曼城日前用成3,200萬鎊（約3.89億港元）買入27歲中堅奧達文迪，但曼城一向係主攻球隊，防守唔係強項，右閘薩巴列達受傷抖4周，防線有漏洞，今場面對識攻唔識守嘅愛華頓，梗係同對方鬥攻喇，一於博大！