巴塞食「包」都骾親

猪拉多纳

MSN唔夠弗 後防曳到震

經過漫長嘅暑假，新一季西甲終於展開！上屆盟主巴塞隆拿今晚將會造訪新鮮出爐嘅西班牙超級盃冠軍畢爾包，戲碼勁吸引。上星期畢爾包喺魯營賽和巴塞隆拿1:1，兩回合計贏5:1，相隔31年再捧走西超盃，真係威過威士忌。今仗畢爾包擁有主場之利，要立不敗之地絕對唔難，隨時贏埋都仲得，受讓嘅2.6倍「讓主」值得捧場。 （now632台周一凌晨0:30直播）

8日前嘅西超盃首回合，畢爾包嘅米基聖荷西中場笠射，收死巴塞門將達史特根，精彩到極，前鋒阿度里斯仲要大演帽子戲法，主場大勝4:0，奠定捧盃嘅基礎。當中前鋒阿度里斯，兩回合4度攻破巴塞大門，成為最大功臣，今場隨時再做英雄。再講吖，畢爾包一向主場對強隊都有一手，上季皇馬到訪跌晒3分，前季巴塞作客嚟到亦3分盡失，足見畢爾包主場威力強勁。

巴塞隆拿開季前雖然擊敗西維爾，擸走歐洲超級盃，但佢哋喺呢場波勁失4粒，後防表現曳到震，連同西超盃兩回合，3場波夾埋失咗9球，門將達史特根、後衞馬斯巴查更係錯漏百出。
捧盃功臣阿度里斯

兩鬥巴塞省四粒

再講，巴塞守將碧基停賽，後防勢成隱憂。前線方面，「MSN」正選掛帥，弊在美斯、尼馬遲歸隊，狀態最多得8成，柏度洛迪古斯又過檔車仔，新加盟嘅阿達杜倫又未踢得，加埋精神支柱沙維離開，以上種種原因，令張峰相信巴塞今場贏唔到，要讓波梗係撐畢爾包啦！