皇馬讓客有買趁手

猪拉多纳

希杭輸級數神仙難救

力爭重登西甲冠軍寶座嘅皇馬今晚登場，新帥賓尼迪斯首次帶領「銀河艦隊」喺聯賽出擊當然唔衰得。最重要係會方宣布留用賓施馬，加里夫巴利亦要用行動證明自己值得做正選，兩大鋒將決心要踢爭氣波，睇怕新升班嘅希杭求神拜佛都唔掂，1.52倍「讓客」趁熱食。（now632台周一凌晨2:30直播）

《馬卡報》上周五做咗個民調，畀「艦躉」票選佢哋心目中嘅最佳正選陣容，C朗、莫迪歷同卻奧斯呢啲骨幹梗係榜上有名啦，不過巴利個位就畀艾斯高搶咗。好在主帥賓尼迪斯講明重用「大聖爺」，老細睇你台戲，巴利又點可以唔做齣好戲報答「肥賓」先？
巴利 賓施馬踢爭氣波

希杭拜聖母求好運

與此同時，皇馬高層都話唔會買前鋒，意味住賓施馬唔會過檔阿仙奴，由想賣你到冇人用要你留隊，「賓仔」當然要用入球證明存在價值，戰意唔使懷疑，會方賽前亦宣布同中堅比比再續約1年至2017年。

新升班嘅希杭開季前按照球會傳統，去咗西班牙西北部拜聖母，希望新季順順利利，不過今晚喺主場鬥皇馬都睇怕幾難有運行。佢哋件中場羅拉同祖利奧洛迪古斯都養傷，啱啱由巴塞借入嘅「新莫迪歷」夏利洛域有可能擔正，主帥費南迪斯話今季有救喎，睇佢堂堂西甲球隊要靠件19歲細路打救，就知佢哋班波有幾削啦！