馬模唔赦些路迪追一粒唔難

猪拉多纳

馬模主場對些路迪呢場歐聯外圍賽附加賽次回合雖然冇乜星級球員，但唔代表一啲睇頭都冇，淨係睇馬模點樣落力阻止「豬路迪」出線都夠好睇啦！馬模門將祖漢韋蘭特上場鬧爆些路迪球員似豬，踢法冇腦，一味得個茅字，今場返到主場梗係要畀番啲顏色佢哋睇，平手盤撐馬模！

（有線62及202台周三凌晨2時45分直播）
誓懲罰「豬」一般對手

馬模首回合作客些路迪力戰而敗輸2比3，其中第2個作客更係喺補時階段取得，可見馬模夠晒韌力，輸緊1比3都冇放棄。賽後馬模門將韋蘭特炮轟些路迪踢法「那渣」：「佢哋係咁侵犯人，個個冇腦諗嘢好似成隻豬咁。」佢仲鬧埋為些軍省入兩粒嘅前鋒利治格菲斯幼稚：「佢全場係咁拉人件衫尾，你估小朋友咩！」睇唔睇到呀各位，馬模陣中有團火燒到「冚冚聲」，今場返到自己地頭，肯定唔會放過呢班「豬」！
些路迪作客例腳軟

些路迪今場有隊長史葛布朗、中場甘文斯及史超活岩士唐因傷上陣成疑，呢隊波喺蘇超惡晒，但一出到嚟歐洲就即刻變無牙老虎，佢哋每逢歐聯作客例牌腳軟，曾經試過畀波蘭球隊歷基亞大炒1比4。些路迪依家只係領先一粒唔穩陣，咁大壓力隨時踢到畏首畏尾，畀勁有火嘅馬模撳住嚟砌。馬模近4仗主場全勝，更犀利嘅係佢哋近9場歐聯外圍賽主場未失過波，今場平手盤勁抵玩。