愛華頓遇弱大省招牌

猪拉多纳

英聯盃今演獨腳戲，由英甲球隊班士利主場迎擊英超球隊愛華頓。班士利自英甲揭幕戰輸波後，近四仗錄得兩勝兩和表現穩步上揚，球隊主場出擊相信唔會踢得保守。「拖肥糖」剛喺主場踢得好而輸畀曼城，球隊急需勝仗重振軍心，今仗必把握機會爭取贏波，阿謙估計今仗入波唔會少，捧大盤！

（TVB 301周四凌晨2時45分直播）

班士利同愛華頓可以話有千絲萬縷嘅關係，近日備受車路士垂青嘅「拖肥糖」中堅史東斯，正正係班士利嘅青訓產品，2013年1月以350萬英鎊轉投愛華頓。

或者覺得班士利嘅青訓產品係信心嘅保證，「拖肥糖」上星期又向班士利出手，以200萬鎊收購另一年輕後衞賀基迪，實行將一條後防「班士利化」。
班士利心雄主場駁火

講番今場波，班士利自從開咧首仗輸畀車士打菲特後，近四仗攞到兩勝兩和，其中喺英聯盃首圈法定時間打和斯肯索普後更射贏十二碼過關，證明球隊狀態唔錯，今次主場出戰絕對有力喺對手身上攞到入球。

愛華頓今仗雖有希拔、巴尼斯、派拿及艾登麥基迪有傷唔踢得，中場吉遜因為醉駕與踩單車嘅市民爭執而被控今仗上陣成疑，加上應會好似去季踢英聯盃咁，收起部分主力讓副選球員上陣。不過，一班愛華頓副選球員都肯定會搏命，希望爭取勝仗振軍心，加上雙方近兩次交手都開出大盤，阿謙估計呢場波入波唔會少，一於捧入球大。