紅魔有前有後 再o趙布魯日

猪拉多纳

羅美路腳頭好

歐聯附加賽次回合繼續有好戲，布魯日返主場對曼聯，受讓半一都冇着數，因為布魯日隊長添美西蒙斯喺首回合傷埋，中堅麥切爾又要停賽，原本已經傷兵滿營嘅布魯日，仲邊有運行呀？相反，「紅魔」新門將羅美路超好腳頭，上陣4場3次保持不失，有佢把關，開2.1倍上盤機會大好多！

（有線61及201周四凌晨2:45直播）
布魯日殘陣狀態曳

布魯日喺首回合輸1:3後，日前喺聯賽作客又以0:2不敵華雷根，狀態曳到得人驚。鬼咩，原本布魯日已經傷兵成籮，隊長添美西蒙斯更加喺首回合傷埋，新球員質素又相當一般，最近走勢下滑真係好正常喎，而且佢哋返到主場，形勢上根本冇得守，中堅麥切爾停賽，睇怕會令佢哋更大鑊，再輸多鋪絕對唔奇。

曼聯日前喺聯賽主場被紐卡素守和0:0，突然又傳佢哋想買皇家馬德里嘅翼鋒加里夫巴利，甚至硬搶巴塞隆拿嘅新天王尼馬。講真，我就真係唔多信「紅魔」會撬到佢哋過檔，但既然領隊尹戈爾唔滿意球隊前線嘅表現，但又讚到「新金7招牌」迪比天上有地下無，即係暗示開季後未入過波嘅隊長朗尼唔掂，睇怕「魔童」真係要快啲交貨開齋至得，否則嚟緊可能又要墜後踢番進攻中場。
羅美路4戰僅失1球 尹帥逼朗尼做嘢

仲有，曼聯雪藏扭計轉會嘅迪基亞後，緊急買入阿根廷國家隊門將羅美路，呢鋪似乎賭贏咗！事關羅美路入「魔」後，開季4次把關只係僅失1球，而且首回合對布魯日失嗰球波，仲要係卡域克門前擺烏龍添，基本上唔關羅美路事，既然「紅魔」解決咗尹戈爾上任後最頭痕嘅防線問題，相信今季大把世界，要贏多次布魯日唔難喎！