車仔搶宮形勢大好

猪拉多纳

上季英超冠軍車路士今晚主場鬥水晶宮，車仔踢到第3輪先至打開今季聯賽勝利之門，認真失威。新兵柏度洛迪古斯首戰披甲即有波入，雖然可喜可賀，但車仔喪失以往「大巴」穩健防線，3戰失咗7球，已相當於上季英超總失球嘅兩成有多。後防支柱泰利今場停賽，更加難保清白之身。水晶宮喺柏杜執教下，踢得有板有眼，入波機會唔低，一於捧大盤。

（now621周六晚10時直播）

車路士上仗有柏度洛迪古斯壓陣，進攻明顯較銳利，佢可從右路側擊，亦可入楔中路攻門，令對手防不勝防。同時減低對左路夏薩特嘅依賴，令佢同迪亞高哥斯達有更大活動空間。車仔上仗半場已攻入西布朗3球，中前場的確踢得好爽。不過，車仔防線畀唔到人信心，莫連奴自己都唔信任兩位中堅，繼早前對曼城，半場換走泰利後，上仗將加利卡希爾貶為後備。不過，獲重用嘅小將葛特蘇馬暫時未夠班代替兩人。包括社區盾在內，車仔今季4場正式比賽場場有失波，恐怕今仗亦難保清白之身。
水晶宮新援對辦

水晶宮喺柏杜英明領導下，今季簽入卡比耶、巴卡利沙高、域咸等進攻好手，卡、巴二人已取得入球，效果立竿見影。加上前鋒韋費特沙夏同李青龍都有質素，入波本錢充裕。水晶宮早前鬥阿仙奴只係僅輸1比2，應可為車仔防線構成唔少威脅。由於雙方都有入波本錢，大盤實係不二之選。